ఒక వీరుడి పునర్జననం కోసం

అది 18 August, 1945. ఒక విమానం గాల్లోకి లేచింది. గాలిని కోస్తూ దేశ సరిహద్దుల్ని దాటుతో రివ్వున దూసుకుపోతోంది. యింతలో చల్లని గాలి చండప్రచండంగా మారి మృత్యు హోరులా ఆకాశంలో గింగుర్లో కొట్టడం మొదలుపెట్టింది. వున్నట్టుండి విమానం పల్టీలుకొడుతో పర్వతాల లోయల్లో కూలిపోయింది.

*

ఆకాశం పిక్కటిల్లేలా దిక్కుల్ని దిగ్బంధం చేస్తున్న భారతీయుల సమరనాదాలు హఠాత్తుగా ఒక్క క్షణం ఉలిక్కిపడి మూగపోయాయి. కోట్ల మంది ఆర్తుల కంఠనాళాల్లో ఒక లిప్తకాలం నిశ్చబ్దం.
అది నిశ్చబ్దం కాదు.
మృత్యువు పన్నిన వలలో ఇరుక్కున స్తబ్దతలాంటిదేదో?...
భారతీయుల గుండెల్లో ఒక్క క్షణం ఎగసిన సహస్ర దుఃఖపు కెరటాలు.

* * *

క్యాలెండర్లో పేజీలు మారాయి. దేశానికి స్వతంత్ర్యం వచ్చింది. సంబరాలు మిన్నుముట్టాయి.
అయినా మినుకు మినుకుమంటోనే వుంది ఒక సందేహం.
ఆ సందేహం చినుకుగా మొదలై వరదలై పొంగి ఉప్పెనయి ప్రభుత్వాన్ని పోటెత్తాయి.
భారతీయుల గుండెల్లో ఆ పేరు యింకా మారుమ్రోగుతోంది.
కొన్ని వేల ప్రశ్నలింకా జనమంత సంద్రాలై ఉవ్వెత్తున ఎగిసిపడుతోన్నాయి.

ఈ ప్రస్థానం ఆ వీరుడి పునర్జననం కోసం...